Aapke ghar main shaadi ho, to ek ajeeb kabhi na thakne waali shakti aap main aa jaati hai. Mausam se, samay se, bhookh se – sab cheezon se bekhabar aap din raat kabhi halwai, kabhi card wale, kabhi boutique waale, to kabhi hotel ke chakkar lagate rehte hai ki jis thithi par shaadi hai tab tak sab theek thak ho jaye.
Theek aisa hi mahaul chunaav ki ghoshna se netaji aur har political party ke daftar main hota hai. Ek nayi ummed harek ke mann main jagti hai ki shayad iss baar humaari party hi jeetege. Manifesto ki itni chinta nahi hoti jitni iss baat se ki daaru, paise, mobile ke illawa aise kaun se naye lalach voter ke saamne rakhe jaye.
Haryana main Jind assembly seat par wahan ke sitting INLD ke MLA Dr Hari Chand Midha ke dehant se purey kasbe main khalbilli si mach gayi hai. Unke bête ko sahanbhuti ke vote dalne ki ashanke se BJP ne jaldi se Krishan Midha ko INLD se BJP main mila liya.
Abhi BJP apne iss chaal se aise muskura rahi thi jaise ek bili dhoop main beith kar apke doodh se saari malai chaat kar baithi ho, ki khabrein aane lagi ki billi ke apne ghar main hi chori ho gayi. BJP main 4 netaon ke vidroh ki khabar hai. Andaaze yeh bhi lagaye jaa rahe hai ki doodh ki malai ke chakkar main aur vidroh bhi ho sakte hain.
Udhar Chautala parivaar ke sahibzaade ka aatm vishwaas aasman ko choo raha hai. Bilkul aisa jaise har bhartiya cricket team ko lagta hai jab woh videshi daure par jaati hai. Jab wohi Indian team waapas aati hai to zyaadatar haar ke bahane hi ginaa rahe hote hai. Dushyant Chautala ki JPP party bhi iss bye election main apne ummidwaar khara karegi, aur unka man na hai ki unki paari ki shuruat Jind ki jeet se hogi.
INLD, Congress aur AAP ke digajj bhi ab badam kha kha kar nayi ranniti par datey hai. Aaney waale dinno main kaun kise manayga, kaun roothega, kis ka kis ke saath gathbandhan hoga, who kisi reality show ke finale se kum dilchasp nahi hoga.
Kya Jind ki jeet aney waale Assembly elections ka sahi map dand hoga?
Kya Jind, Haryana ka naya Kurukshetra saabit hoga?
Discussions
Discussions
